SIN
大概兩年前第一次見從網上認識嘅@sinns (下稱"倩")，後來有幸請到佢幫手為兩件PLPL傢俱進行拍攝工作，當日先要將兩張櫈上門交底俾佢。由於佢住嘅地方係冇𨋢，身子弱＋BMI超標嘅我搬完上氣唔接下氣。記得當日穿過大門後有一條小走廊，而走廊內有好幾幢門通往不同的單位，而佢係住喺"尾門"。入到屋內放低兩張櫈，坐低飲水抹汗，一邊喘氣一邊環顧四周嘅佈置，牆邊凌亂嘅布碎、書架上嘅書籍及枱上嘅手繪草圖令我有種唔係Déjà vu但又似曾相識相識嘅感覺，而一眼就睇得出佢係一個讀Fashion嘅人。當日見面只係好幾分鐘，加上事隔兩年，已經唔係好記得當日嘅對話內容，只係記得我問咗佢一個類似而又有啲多餘嘅問題.....

PLPL: 咁你遲啲畢業後想喺Fashion Industry度工作? 會想做咩崗位?
倩: (猶豫咗一陣) Hmmm...我都未知呀，因為鍾意所以讀，之後先再算.....

第二次見面係交還凳子，第三次喺PLPL POP UP中，而今次係第四次。當日相約喺佢屋企附近嘅茶餐廳見面，由於已經見過好幾次，見外嘅感覺已被豁免，坐低點完嘢食後就互相大家update大家嘅現狀。正當我哋討論緊一陣去邊度photowalk嘅時候，原來大家都不約而同對附近山上嘅廟宇好有興趣，所以我哋食完嘢之後就馬上衝咗上山。
Google之後，原來我哋去嘅地方係位於筲箕灣愛秩序村4227號地段的廟宇群。六間廟宇以福德祠最早落成 (1970)，後來有觀音廟 (1971)、關帝廟 (1976年)、洪聖古廟 (1980)、張飛廟 (1982) 和劉備廟 (1993)，是香港難得一見的廟宇建築群。福德祠和洪聖古廟是舊村居民信仰的延續，而張飛廟和劉備廟則是新廟，同時是全香港唯一同時供奉劉備、關羽及張飛三人的地方。

我係冇宗教信仰，唔拜神唔祈禱唔迷信，但無可否認呢類型有關信仰或者宗教嘅建築物係俾到我一種舒服而靜心嘅感覺，加上當日計埋我哋及廟宇內嘅工作人員十個人都冇，呢個vibe真係好正，喺呢個環境底下，我哋就開始冇主題地傾偈。兩年前剛剛認識倩時佢正在修讀時裝設計課程，但不久之後佢明白到如果要做一個結結實實設計者，對製衣流程及裁剪技巧嘅認知係不可或缺嘅一環。然而課程內容未必能夠滿足到佢呢方面嘅需求，所以佢早前已經quit咗，依家正在跟一位經驗豐富嘅前輩學習有關製衣嘅技巧，另外積極儲錢希望日後可以在外地深造。離開主流學院去追逐自己真正想要嘅知識，落呢個決定其實一啲都唔容易，因為喺香港呢個制度下只要你行嘅路同人有少少唔同，壓力就會不期然地產生出來。但倩感受到到現在佢嘅選擇同佢想要嘅嘢只會越來越近，其他嘢可以不理，而現在擁有清晰目標及計劃嘅佢令我覺得同佢真實嘅年齡差異甚大。

事實上我過往喺不同設計範疇都見好多能夠畫得一手好圖嘅設計師，但擁有着薄弱嘅製作知識，往往倚賴vendor/contractor/師傅幫手諗掂佢，其實呢個習慣係好唔要得。當初接觸設計時，我已經知道自已唔會係一個手工藝者，亦無一顆職人嘅心，但唔代表我對製作完全一曉不通。仲記得早年同朋友一齊學習設計傢俱時，晚晚都係studio睇youtube學習木工技巧；每次喺街上見到有興趣嘅物體就上下其手，左摸右摸了解如何製造；亦非常珍惜每一次去廠房跟施工師傅學習嘅機會；當然最直接不過就係跌錢跌時間捱鬧嘅經驗。一直強迫自己成為一個"畫得出就build得出"及高還原度嘅設計者，同自已講製作細節及知識一定唔會夠製作者精通純熟，但一定要有足夠嘅知識喺腦中組成"可行性消化系統"，將天馬行空後嘅想法徹底過濾。戒咗"師傅麻煩幫我諗諗....."呢句說話，取而代之係"師傅我呢度打算.....你有冇意見?" 所以我係樂見倩有呢個轉變，而我會形容為"早知早享受"。

唔知係唔係劉關張及觀音等神明釋出嘅氣場下，我哋沒有代溝地盡情分享大家嘅故事及想法，例如互相分享自已"離開主流"嘅辛酸、最近睇開邊個artist嘅嘢、倩正在計劃嘅online zine、佢對未來工作的想法、又講吓我自己近年迷上嘅documentary photography點樣影響自己、早年唔見得人嘅IELTS分數(anyway5分...)，分享好少同人講嘅終極目標 bla bla bla....而當日我哋兩個對話當中最常出現嘅字句就係"自我實現"。如果美國心理學家馬斯洛嘅需求層級理論係堅嘅話，當一個人滿足咗較低層次嘅需求後 (如安全感)，下一步佢就會嘗試滿足更高嘅需求 (如自我實現)，對生命的滿意度也隨之提高。雖然實唔實現到依家就唔知，但我哋兩個應該都有呢個傾向，事實上我覺得每個人都應該需要有呢個傾向。當日傾咗兩個鐘，竟然只係影咗10幅相，可想言之我哋兩個係幾咁傾得。落山後，倩返咗屋企，當我去到地鐵站門口時停咗幾秒諗咗陣，之後回頭再上山用菲林記錄一下呢個廟宇群，再自己靜靜地諗吓......

If you plan on being anything less than you are capable of being, you will probably be unhappy all the days of your life.
— Abraham Maslow

最後一張相係倩家中部份PLPL items嘅生活狀況，包括成日陪伴佢上紙樣堂嘅"變身"tote bag、又坐得又踩得又睇得嘅"Cut & Slip" stool (全世界得呢張prototype，多謝倩肯收留)及牆上具宗教氣息嘅"I believe in Wi-Fi" postcard。

- Photographed in Apr 2023 -

PING LING PANG LANG